Быел республикабыз өчен аеруча мөһим ел. Тассрның 100 еллыгы, бөек җиңүнең 75, Татарстан республикасы суверенитеты декларациясе кабул ителүенең 30 еллыгы. Бөек җиңүнең 75 еллыгы уңаеннан, Түбән Камада “Мобиль бригада” республика проекты кысаларында, җиңү каһарманнарына кәрәзле телефоннар бүләк итәләр. Әлеге игелекле эштә “Җиңү волонтерлары” Бөтенроссия иҗтимагый хәрәкәте активистлары да катнашты.
Гаяз Минһаҗев бүләкләр кабул итә — волонтёрлар сугыш ветеранына түләүсез элемтәле кесә телефоны тапшыралар. Заманча җайланма олы буын вәкилләре өчен бик уңайлы итеп ясалган — зур төймәле, ашыгыч хезмәтләр номерлары инде кертелгән. Мондый бүләк Җиңүнең 75 еллыгы уңаеннан ясала, ветеран аны сөенеп кабул итеп ала.
Гаяз Минһаҗев армия сафларына унсигез яшьтә алына. Кубан кавалерия дивизиясендә хезмәт итә. Курск дугасы сугышларында катнаша. Кызыл Йолдыз ордены, “Батырлык өчен” һәм “Германияне җиңгән өчен” медальләр
белән бүләкләнә. Советлар армиясеннән хезмәт итеп кайткач, ул мәктәптә тарих укыта – соңыннан Түбән Кама йөк шиннары заводында эретеп ябыштыручы булып эшли.
Кесә телефоннары сугыш инвалидлары һәм анда катнашучы ветераннарга “Мобиль бригада” республика проекты кысаларында тапшырыла — заманча җайланма дәһшәтле вакыйгаларны үз күзләре белән күргән 29 түбәнкамалыга бүләк ителәчәк.
