Быел Казанга «Хезмәт батырлыгы шәһәре» дигән мактаулы исем бирелде. Башкалабызның әлеге мактаулы исемгә лаек икәнен “Чтобы помнили-Хәтерләсеннәр» китабы тагын бер кат раслады. Бу хакта Язучылар берлегенең Тукай клубында үткәрелгән китапны тәкдим итү кичәсендә дә әйтелде.
“Чтобы помнили -Хәтерләсеннәр …» китабы-уникаль халыкара проект. Ул Россия, Беларусь, Украина, Әзербайҗан, Латвия, Германия, Израиль һәм Испания фронтовик- язучыларын, яңа буын язучыларын берләштерде. Китапта тупланган сугыш һәм тынычлык темасына кагылышлы шигырьләр, проза әсәрләре халыкның батырлыгы һәм хәтере турында сөйли. Җыентыкның 42 авторы һәм тәрҗемәчеләре арасында татар әдәбияты вәкилләре дә лаеклы урын алган. Басманы тәкъдим итү кичәсендә китапларның бер өлеше Татарстан Республикасы китапханәләренә бүләк итеп бирелде. Әлеге уникаль җыентыкны «Өмет» фонды әзерләгән.
