Казан ратушасында ТАССР төзелүнең 100 еллыгын билгеләп үтүгә багышланган утырыш узды. Аны бәйрәмне оештыру комитеты җитәкчесе, Россия вице-премьеры Марат Хөснуллин үткәрде. Ул шулай ук башкалабызның Сәетгалиев исемендәге яңартылган мәдәният йортында булды.
Сәет Галиев исемендәге яңартылган мәдәният сарае сәхнәсендә беренче спектакль. Капиталь ремонттан соң аны тантаналы рәвештә Россия Хөкүмәте Рәисе урынбасары Марат Хөснуллин һәм Татарстан Президенты Рөстәм Миңнеханов ачтылар. Объект илкүләм проектларны гамәлгә ашыру нигезендә реставрацияләнгән. Татарстанның социаль-икътисади үсеше мәсьәләләренә багышланган киңәшмәдә төзелеш турында да фикер алыштылар.
Россия Федерациясе Хөкүмәте Рәисе урынбасары Марат Хөснуллин:«Якын көннәрдә барлык снипларны, кагыйдәләрне, Гост таләпләрен үз эченә алган карар чыгарылачак. Аларның 30 проценты рекомендацион характерда булачак. Болар 3 мең норматив. Парковкалар, төзелеш һәм юл төзелеше мәсьәләләренә дә кагыла.»
Проектлаучылар һәм заказчыларга уңайлыклар булачак. Төзелешне финанслау һәм кредитлау турында да сөйләштеләр. Ә Казан Ратушасындагы утырышның төп темасы-ТАССРның 100 еллыгын билгеләп үтү иде.
«Нәкъ йөз ел элек Казан губернасы башкарма комитеты вәкаләтләрен Татарстан Республикасы революцион комитетына тапшыру турындагы актка кул куела. ТАССР тарихы башланган беренче документларның берсе бу.»
Ратушада беренче конституция, флаг, бик күп уникаль документлардан күргәзмә дә оештырылды.
Татарстан Республикасы Президенты Рөстәм Миңнеханов: «Билгеләнгән эшләрнең берсен дә бергенә көнгә дә тукталып тормадык, алар графикта яки алдан бара. Ә барлык массакүләм чараларны да без соңрак вакытка күчердек, без аларны барысын да уздырачакбыз. Һәм лаеклы уздырачакбыз.»
