Салих Сәйдәшев исемендәге зур концерт залында Кызыл Армия сугышчыларының нәсел дәвамчыларына хәрби бүләкләр һәм Бөек Җиңүнең 75 еллыгы медальләре тапшырылды. Залга Әфганстан, Сүриядәге хәрби хәрәкәтләрдә катнашучылар, концлагерьлар тоткыннары, Ленинград камалышында калучылар җыелды. Бүләкләрне президент Рөстәм Миңнеханов тапшырды.Тарихта калган 44 нче елдагы командир приказы тыныч Казанда кабат яңгырый. Аны сугыш каһарманы Вәли Фазлыев үзе генә ишетә алмаган. Җиңү көненә бер ел кала һәлак була. Дошман окобына үтеп кереп, фашистларны әсирлеккә алган батырлыгы өчен бүләкләнүен дә белми кала. 76 ел узгач кына сугышчан бүләк — “За отвагу” медале нәсел дәвамчыларына тапшырылды.
«За боевые заслуги» медален Нургали Галиуллин да вакытында алмый кала. Медальне кызы Фәһимә апага тапшырдылар.
Һәр сугышчан бүләк – тарих өлгесе. Аяусыз сугышта батырлык күрсәткән исән ветераннарның күкрәкләренә Җиңүнең 75 еллыгы медальләрен тактылар. Залда утыручылар һәр ветеранны аягүрә басып хөрмәтләде. Ветераннарга сәхнәгә күтәрелергә парад формасына киенгән кадетлар булышты.
Залда Бөек Ватан сугышы ветераннары, концлагерьлар тоткыннары, Ленинград камалашында калучылар, шулай ук сугыш афәтен Әфганстанда, Кавказда, Сүриядә кичергән сугышчылар утыра. Кайберләренең янәшәсендә – хатыннары. Рөстәм Хәбибуллин хатынын сугышчан дусты дип саный. Менә 66 ел инде орденнар балкышында һәм шат елмаеп, бергәләп якты көнне каршылыйлар.
Диана Василова, Регина Сафиуллина.
