Бөек Ватан сугышында Җиңүне якынайтуда тыл хезмәтчәннәренең дә өлеше бәһасез. Чүпрәле төбәгендә туып-үскән Хәлидә апа Тукаева — сугыш чорында фидакярьләрчә эшләгән ветераннарның берсе. 90 яшьлек ветеран яшьнәп үткән яшьлек елларын, сугыш китергән ачы газапларны, кайгы-хәсрәтләрне бүгенгедәй хәтерли. Әле куллары да ныгып җитмәгән яшүсмер кыз колхоз кырында ашлыгын да иккән, чатнама салкыннарда Идел арьягында окоп та казыган.
Фашистлар Германиясе туган илебезгә һөҗүм иткәч, озак та үтми Идел буенда оборона чиген булдыру турында карар кабул ителә. Татарстан, Марий Эл, Чуашия территориясендә 350 километр озынлыктагы ныгытманы тиз арада төзергә кирәк була. Окоп казу эшләренә нигездә хатын-кызлар, яшүсмер балалар җәлеп ителә.
Чүпрәле районының Зур Чынлы авылында яшәүче Халидә Тукаевага ул чакта нибары 10 яшь була.
Оборона ныгытмасын бер ел төзиләр. Җирне тирән казыйлар. Халидә апа бер вакытта әсир немецларны Зур Чынлыга алып кайтуларын искә ала. Тик аларны окоп казырга җибәрмиләр. Тоткыннарны бакчаларда, кырларда эшләтәләр. Фронтка ашлык кирәк була.
Тыл ветераны күп нәрсәне хәтерли. Җиңү хәбәрен урамда ишетә. Шатлыкларының чиге булмый, авыл клубына җыелышып, кочаклашалар, елашалар.
Халидә Тукаева әле дә сугыштан соңгы авыр, әмма күңеленә рәхәт елларны искә ала. Бер-берсен хөрмәт итеп, ярдәмләшеп, тату яшәүләрен кат-кат исенә төшерә. Хәзерге яшьләргә дә әйтер сүзләре бар аның.
Бөек Җиңү көне якынлашкан бу көннәрдә Халидә апа башка тыл ветераннары кебек үк, хатирәләрне искә төшерә. Хәзерге яшәү муллыгына шөкерана кыла. Күкләребезнең аяз булуын, тыныч-имин яшәвебезне теләп, чын күңелдән догалар укый, теләкләр тели.
Дмитрий Второв, Ренат Сәхибгәрәев, Ленар Хәбибуллин, Татарстан яңалыклары.
