Бөек Җиңүнең 75 еллыгын бәйрәм итү алдыннан Алабуга районында ветераннарның өйләренә ашамлыклар илтеп бирү акциясе башланды. Җирле бюджет хисабына дүрт меңгә якын азык-төлек җыелмасы сатып алынган. Шундый җыелманы беренчеләрдән булып Бөек Ватан сугышы ветераны Хантимир ага Хөрмәтовка тапшырдылар.
Иң зур бүләк – игътибар. Үз изоляция шартларында ул өлкәннәр өчен аеруча кадерле. Нәкъ менә алар һәрьяклы ярдәмгә мохтаҗ. Ветераннар өченче тагын бер игелекле акция башланды. Бөек Ватан сугышында катнашучылар, Ленинград камалышында калучылар азык-төлек җыелмалары һәм акчалата түләүләр алды. Мондый карарны шәһәр хакимияте кабул итте.
Бөек Ватан сугышы ветераны Хантимер Хөрмәтов: «Безнең буынга күпне күрергә, күпне кичерергә туры килде. Шуңа да картлыгыбыз кадер-хөрмәттә уза. Менә бу ашамлыклар китереп бирүләре дә бик игелекле эш булды. Моны оештырганнары өчен барлык ветераннар исеменнән рәхмәтемне җиткерәм.»
Шәһәр халкы да, предприятиеләр дә төрле игелек акцияләрен хуплый. Әйтик, район җитәкчесе Рөстәм Нуриев, үз хисабына күп балалы 200 гаилә өчен азык-төлек сатып алган.
Дүрт меңгә якын азык-төлек җыелмасын җирле бюджет хисабына сатып алганнар. Чаллыда волонтерлар төркеме азык-төлек пакетларын формалаштыра. Игелекле акция апрель ахырына кадәр дәвам итәчәк. Азык-төлек җыелмаларын «сугыш чоры балаларына» тапшырачаклар, Алабуга районында алар өч меңнән артык. Волонтерлар тыл хезмәтчәннәренә, Бөек Ватан сугышында катнашучыларның тол хатыннарына да азык-төлек китерәчәкләр.
Михаил Филатов.
