Актаныш районының Югары Яхшый авылында яшәүче Бөек Ватан сугышы ветераны Тәфкил Вәли улы Вәлиев быел 95 яшьлек гомер бәйрәмен билгеләп үтәргә әзерләнә. 17 яшеннән фронтка киткән солдат, күкрәген медальләр белән тутырып, кабат туган ягына әйләнеп кайту бәхетенә ирешә. Ветеран әле дә сафта, авыл мәчете имам-хатыйбы вазыйфаларын башкара. Тынгы белмәс ветеран хакында киләсе язмада.
Тәфкил тулы булмаган мәктәпне тәмамлаган елны сугыш башлана, яшүсмер егетнең киләчәктә белем алу хыялы челпәрәмә килә. Авылның хәрби хезмәткә яраклы бар ир-аты сугышка чакырыла. Вәлиевләр гаиләсеннән алты ир егет тә фронтка китә. Шуларның өчесе- Габделвәли, Акмалетдин, Мөхәммәтдин абыйлары яу кырында һәлак була. Тәфкилне бригадир итеп куялар. Ә 42 нче башында сугышка алына, Көнбатыш фронтта немец илбасарларына каршы көрәшә, ә 45 елның августыннан япон гаскәрләрен тар-мар итүдә катнаша.
Япон сугышында елга кичкәндә Тәфкилнең каз оясы үрә белүе ярдәмгә килә. Рота авыл егете ясаган каз ояларын палатка белән тышлап елга кичә. Беренче бүләге-“Батырлык өчен” медален шушы бәрелештән соң тапшыралар. Ә “Сугышчан казанышлар өчен” медале- япон самурае белән күзгә-күз очрашып, каушап калмыйча, үзен дә, иптәшләрен дә саклап калган өчен бирелә. Һөҗүм вакытында Тәфкил абый яралана, 9 ай госпитальдә дәвалана.
Тыныч тормышка 48 елның апрелендә генә әйләнеп кайта. Җимерелгән хуҗалыкны торгызуда армый-талмый эшли. Районның төрле хуҗалыкларында бригадир, прораб, рәис булып эшли. Лаеклы ялгач чыккач, җирле ветераннар оешмасын җитәкли. Тәфкил ага хатыны Разия апа белән 55 ел матур гомер кичерә, өч бала тәрбияләп үстерәләр.
Авылның тынгы белмәс аксакалы әле дә сафта, 35 ел инде авыл мәчете имам-хатыйбы вазыйфаларын башкара. Ачык йөзле, көр күңелле булгангадыр, өеннән кеше өзелми. Киңәшләренә олысы-кечесе колак сала.
Ул имамлык иткән чорда Югары Яхшый, Тәкмәк авылларында мәчетләр салына. Ветеран яшәгән йортка балалары, оныклары еш кайта, сугыш хәтирәләрен тыңларга мәктәп укучылары да килә. Авыл аксакалы аларны тыныч тормышның кадерен белеп яшәргә өнди.
