Без Бөек Җиңүнең 75 еллыгына багышлап, ветераннар белән таныштыруны дәвам итәбез. Чаллыда һәм Тукай районында Бөек Ватан сугышы ветераннарының өйләренә килеп диспансерлаштыруга керештеләр. Ветераннарга поликлиникаларда чиратсыз тикшерү узу хокукы булса да, һәр каһарман да үзе медицина учреждениесенә барып җитә алмый. Шуңа күрә табиблар алар янына үзләре бара.
Медицина персоналы белән бергә, фронтовиклар янында безнең иҗат төркеме дә булып кайтты. 93-яшьлек Бөек Ватан сугышы ветераны Мифтах ага кунакларны җырлап каршылый. Сугыш чоры хәтирәләрен исенә төшерә. Фронтка 1943 нче елда чакырыла. Румынияне, Чехословакияне, Венгрияне, Австрияне фашист илбасарларыннан азат итүдә катнаша.
Бөек Ватан сугышы ветераны Мифтах Нуретдинов: «Җиңүне ура кычкырып каршыладык. Венгрияне, Австрияне азт иттек. Сугыш 8 нче майда Австриядә Альп тауларында тәмамланды».
Ветеран өчен Җиңү көне төп бәйрәмнәрнең берсе, парадны ел саен карап бара. Быел парад аеруча истәлекле булачак. Сәламәтлекнен нык булуы кирәк. Табиблар аны җентекләп тикшерде.
Сугыш ветераннары госпитале баш табибы Резидә Мәүҗетова: » Мультидисциплинар бригада белән чыгабыз, терапевт, фельдшер, невролог, окулист, лор кебек махсус белгечләр бар.»Табиблар 98 Бөек Ватан сугышы ветеранының сәламәтлеген тикшерергә тиеш. Алар Чаллыда һәм Тукай районында яши. Көн саен 5-7 ветераннын сәламәтлеген тикшерәләр. Сәламәтлекләрен ныгыту өчен стационарга юллама бирәләр, Җиңү бәйрәме алдыннан ветераннар сәламәт булырга тиеш.
Хезмәт ветераны, Бөек Ватан сугышы ветераны хатыны Рәсимә Ганиева: «9 майда парадка бергә чыгабыз. Исәнлек булсын, бәйрәмне күрәсебез килә.»
Сугыш ветераннары госпитале табибы — невролог Тәлгат Ситдийков: » Ветераннар нык, физкультура белән шөгыльләнгәннәр, сәламәтлекләренә карата игьтибарлы булганнар. Күбесе яхшы хәлдә, шулай да профилактика үтү өчен аларны хастаханәләргә салабыз.»
Бөек Ватан сугышы ветераннарыннан соң, тыл хезмәтчәннәрен, сугыш чоры балаларын, концлагерьлар тоткыннарын өй шартларында тикшерергә керешәчәкләр. Барысына да тиешле ярдәм күрсәтеләчәк.
Эльмира Гайнетдинова, Илнар Мостафин.
