Киләсе видеоязмабыз Зәй районыннан оста куллы Рузилә Нефедова турында. Аның тылсымлы куллары ниләр генә башкармый. Курчаклар өчен милли күлмәкләр тегә, күз явын алырлык картиналар ясый. Аның иҗат җимешләре хәтта чит илләргә кадәр дә барып җиткән. Зәйдәге хәбәрчебез Әдилә Борһанова да сокланырлык эшләрне күреп кайтты.
Оста куллы Рузилә Нефедова әле дә сихри балачак дөньясыннан аерылмый. Әниле-кызлы уены гына олыларча хәзер – ул курчакларга күз явын алырлык киемнәр тегә. Беренче курчакларын тәрҗемәче булып эшләүче кызы соравы буенча киендерә. Ул эшләре аның Германия якларына китә.
Рузилә Нефедова өчен һәр курчак кадерле. Берсеннән-бер матур, милли күлмәкләр кигән курчакларның урыннары түрдә. Күлмәкләрне тегәр алдыннан һәр милләтнең зәвыгын, үзенчәлекләрен өйрәнә. Аерым детальне җентекләп сайлый, аннары беркетә. Бәйрәм алдыннан алсу битле Кар кызлары, горур басып торучы Кыш бабайлар — аның иҗат сандыгына өстәлә.
Ә иҗат җимешләре Австралия, Америкага кадәр барып җиткән. Алты ел дәвамында ул 100дән артык курчакка җан җылысын өргән. Бераз курчаклар бизәгәч, Рузилә ханым балачак шөгылен – картиналар ясауны искә төшерә. Кулына пумала, төсле буяулар алып, туган як табигатен сурәтли башлый.
Гүзәл табигатьне, кояш баю күренешләрен яратуын яшерми оста. Тәрәзә артындагы пейзаж, һәр ел фасылындагы урман илһамландыра аны. 70 яшьтә булуына карамастан, Рузилә ханымның кул эшләреннән туктаганы юк. Гади генә сәйләннән дә могҗизалар ясый. Аларның йортыннан кеше өзелми. Килгән һәр кунакны ачык йөзе һәм телне йотарлык торт, кекс кебек чәй ризыклары пешереп каршы ала.
Кышкы кичләрдә яраткан шөгыльләрен кулына алса, яз-җәйдә үзе яшәгән йорт ишегалдын бизәү белән мавыга. Йортның барлык подъездларына да аллы-гөлле чәчәкләр утыртып, тирә-юньне ямьләндерә.
Әдилә Борһанова, Александр Тимофеев, Максим Майоров, Татарстан яңалыклары, Зәй районы.
