Көне-төне кырда эшләүче авыл хуҗалыгы хезмәтчәннәренең нәтиҗәле эше өчен шартлар булырга тиеш. Ә тәмле итеп тукландыруны оештыру уңышның яртысы дигән сүз. “Зәй шикәре” агрофирмасы пешекчеләре бу турыда яхшы белгәнгә менюны төрлеләндереп, ризыкны өйдәгечә тәмле итеп әзерләргә тырыша.
Һәр иртәдә беренче, икенче ашын өлгертә, шул арада коймагын да басып куялар. Сүзебез “Зәй шикәре” агрофирмасы хезмәтчәннәрен тәмле ризыклары белән сөендерүчеләр хакында.
Лузалия Фәйрушинага әниле-кызлы Алевтина һәм Валентина Егоровалар да ярдәм итә. Ризык әзерләү өчен аш бүлмәсендә уңайлыклар җитәрлек. Беренче һәм икенче ашларны һәрвакыт төрләндерергә тырышалар. Алар янына яшелчәләрен пешереп, салатын да ясыйлар. Чүпрәле камырдан чәйгә татлы ризыклар да әзерләргә өлгерәләр. Урак өстендә көненә 70-80 кеше ашаталар.
Әзер булган ризыкны зур-зур савытлар белән басуга илтәләр. Агрофирманың машина йөртүчесе Семен Кузнецов бу эшне зур җаваплылык белән башкара.
Кыр хезмәтчәннәре төшке һәм кичке аш вакытларын түземсезлек белән көтеп алалар. Кызу урак өстендә генә түгел, пешекчеләр ел әйләнәсе агрофирма хезмәткәрләрен тәмле ризыклар белән сыйлыйлар. Бар күңел җылыңны биреп әзерләгән ризыкны яратып ашаулары тагын да рухланып эшләтә, ди алар.
Адилә Борһанова, Александр Тимофеев, Максим Майоров, Татарстан яңалыклары, Зәй районы.
