Зәй районы Югары Лоҗы авылында йөзгә якын хуҗалык бар, шуның 20-30ы вакытлы матбугат алдыра. Хатлар, газета-журналлар, пенсия тарату — һәммәсе дә почта хезмәткәрләренең кулы аша уза. Биредә Хат ташучы Илшат Җәләевны да авыл халкы туганы кебек каршы ала.
Илшат Җәләевның көне Бигеш авылындагы төп почта бүлекчәсендә газета-журналлар кабул итүдән башлана. Атнаның өч көнендә Илшат абый аларны 10 чакрым ераклыкта урнашкан Югары Лоҗы авылына үз машинасында алып кайта. Хат ташучы булып эшли башлаганчы ул Зәй районы мәхәлләсендә мулла булып хезмәт куйган. Туган авылына кайтып төпләнгәннән соң, елдан артык шушы җирлектә хат ташучы булып эшли.
Яңгыр, кар-буран дип тормый, көтеп алган басмаларны вакытында әбунәчегә тарата.
Илшат Җәләевның бурычы газета-журнал тарату гына түгел. Бигеш почта бүлегенең җитәкчесе юк. Шуңа күрә хәзер әлеге җирлеккә караган авыллардан хат ташучылар газета-журналлар, коммуналь хезмәтләр өчен квитанцияләр, пенсия тарату белән мәшгуль. Бу хезмәтнең бер авырлыгын да күрмим, киресенчә горурланып башкарам, -ди хат ташучы Илшат Җәләев
Эльза Әхмәтҗанова, Адилә Борһанова, Александр Тимофеев, Денис Ипатов, Татарстан яңалыклары. Зәй районы.
