Ярминкәләрнең төп максаты – шәһәр халкының ихтыяҗын канәгатьләндерү. Сәүдә мәйданчыкларында, социаль юнәлешле бәяләр куелган авыл хуҗалыгы продукциясе тәкъдим ителә. Әйтик, Мамадыш районы халкы кайсы продуктларны үз итә? Илнур Юнысов белеште.
Илгиз Нургалиев алмаларны күп итеп ала. “Бер өлеше үзебезгә, калганы кунакка барганда күчтәнәчкә”, — ди ир-ат. Аның сүзләренчә, ярминкәдә аларның бәясе дә түбән, ә иң мөһиме – тәмлерәк тә!
Авыл хуҗалыгы ярминкәләре гадәттәгечә шәһәр халкы, бигрәк тә өлкән буын өчен социаль әһәмияткә ия. Биредә алар ит, балык, сөт, май, бал, казылык, сыр, йомырка, бәрәңге, яшелчә, һ.б. сатып алырга мөмкин. Хәләл продукция дә тәкъдим ителә. Сатучы Алевтина Петрова сүзләренчә, бу ярминкәдә дә иң зур сорау тавык йомыркасына.
Авыл хуҗалыгы ярминкәсен оештыру өчен җаваплы булган Шәдче икътисадый зонасы хезмәтчәннәре әлеге бурычларына җитди караган.
Сәүдә рәтләрен район җитәкчелеге карап чыкты. Алар тәкъдим ителгән продукциянең төрлелеге һәм аларга бәяләр белән таныштылар. Ә үзәк мәйдандагы бәйрәм картинасын иҗат коллективлары концерт программасы белән тулыландырды.