Узган ел Югары Ослан районының Ямбулат авылы интернетка тоташты, яңа балалар һәм спорт мәйданчыклары барлыкка килде. Җирле хакимият һәм инвесторның үзара файдалы хезмәттәшлеге турында гражданнар җыенында сөйләштеләр. Алда торган бурычларны хәл итү юллары турында фикер алыштылар.
Ямбулат авылында Захаровларның гыйбрәтле язмышын һәркем белә. Өч кешедән торган гаиләдән ата кеше генә исән, хатыны, улы шикле спиртлы эчемлектән агуланып үлгәннәр. Эчемлекне авылга тәүлекнең теләсә кайсы вакытында читтән бурычка китерәләр. Тик авыл кешеләре генә ялган хәмер сатучы турында сөйләргә ашыкмады.
Шулай да без алкоголь сату урынын күрсәтә алырлык кешеләрне очраттык. Тик менә хуҗалар гына, барысын да кире какты. Бу хәл турында беренче кат ишетәләр, имеш. Ә законсыз сәүдә авылдагы бердәнбер предприятие — «Заря»агрофирмасы эшчәнлегенә тискәре йогынты ясый. Авылда яшәүче өч йөз кешенең өчесе шикле хәмер сата.
«Р-Агро» ҖЧҖ генераль директоры Раил Зыятдинов: «Теләүчеләр бар, хезмәт хакларын алганчы паспортларын биреп, самогонны әҗәткә саталар, аннары инде хезмәт хакларыннан түлиләр.»
Авыл халкын мондый сатучылар белән көрәшергә чакырдылар, бу хакта авыл активы белән узган җыелышта, 2020 елга йомгак ясаганда сөйләделәр. Ямбулатта бер ел эчендә күп нәрсә үзгәргән. Авылга интернет кергән, балалар һәм спорт мәйданчыгы төзелгән. Сугыш чоры балаларын бүләкләгәннәр. Боларның барысы да диярлек муниципалитет һәм инвесторның уртак эше нәтиҗәсе.
«Р-Агро» ҖЧҖ генераль директоры Раил Зыятдинов: «Юл салынды, бу авыл халкы файдасына. Дәүләт программасы буенча күп обьект, торак төзелде.»
2020 елдагы нәтиҗәле хезмәттәшлек быел да дәвам итә. Ямбулат авылында Бөек Ватан сугышында катнашкан солдатларга яңа һәйкәл төзелә. Биредә ветераннарның, авылдашлары Советлар Союзы Герое Василий Коноваловның якты истәлеген саклыйлар. Ул 16 дошман танкын яндырган. Яңа су үткәргеч төзергә ниятлиләр.
Ямбулат авыл җирлеге башлыгы Николай Бугорков: «Су кирәк, чөнки халык арта, ә су җитми. Безгә монда янгын часте да бик кирәк.»
Авыл халкы һәм «Заря» агрофирмасы җитәкчелеге бу мәсьәләне хәл итү буенча фикер алыша инде. Әлегә су резервуары өчен җылытыла торган ангар төзергә җыеналар.
Булат Шакиев ,Ленар Хәбибуллин, Татарстан яңалыклары.
