Җылы якларда гына үсә торган виноград безнең җирлектә дә үз культурага әйләнде хәзер. Иске Зәй бистәсендә яшәүче Рәшит Йосыповның бакчасында бу җимешнең нинди генә төре юк. 17 ел мавыгуы дәвамында ул виноградның 20 сортын үстерүгә ирешә. Һәвәскәр бакчачы безгә дә виноград үстерү тәҗрибәсе, яхшы уңыш алу серләре турында сөйләде.
Рәшит Йосыповның зур булмаган бакчасында буш урын юк. 6 сутый җирдә ул 20 төр виноград үстерә. 17 ел элек 8 төптән башланган мавыгу хәзер ел саен мул уңышы белән сөендерә.
Виноград үсентеләре безнең якларда кышны яхшы чыгалар. Соңгы вакытта май аенда була торган кыраулар гына зыян китерә,ди бакчачы.
Виноград үстерү мәшәкатьле , ялкаулар эше түгел,ди Рәшит Йосыпов. Бу өлкәдә белемен арттырып, көньяк җимешен үрчетү технологияләре белән таныша, тукландыра. Кыш көне дә эше туктамый, яңа үсентеләр әзерли. Ел саен ниндидер тәҗрибәләр ясап, уңышны арттыру өстендә эшли.
Тәҗрибәле бакчачының быел утырткан яңа үсентеләре дә көздә инде җимешләре белән сөендерә.
Бу кадәр виноград уңышыннан компот, кайнатма, шәраб ясыйлар. Йөзем итеп тә киптерәләр. Үз бакчаңда үскән сусыл, тәмле исле виноградны кибеттән сатып ала торганы белән чагыштырып булмый шул. Ә көз җиткәч уңышны күрү – хезмәтеңнең бушка китмәвен тою.
