Тукай районы хезмәт алдынгыларының традицион еллык бәйрәме узды. Гадәттәгечә, күп еллар авыл хуҗалыгы тармагын үстерүгә зур өлеш керткән ветераннарны, төрле һөнәр ияләрен хөрмәтләделәр. Ә узган ел районда 140 мең тонна ит, 30 мең тонна сөт җитештерелгән, 175 мең тонна ашлык җыеп алынган.
Хәзерге вакытта Тукай районында 40ка якын гаилә фермасы исәпләнә. Итчелек тармагы табышлы. Бәйрәм алдыннан район фермерлары иттән әзерләнгән һәм башка продуктларын күргәзмәдә тәкьдим итте.
Тукай районы башлыгы Фаил Камаев: «Районда күбесе авыл хуҗалыгы белән шөгыльләнә, эшкәртү сәнәгате өчен дә узган ел уңышлы булды. Шулай ук районда кече һәм урта бизнес предприятеләренең дә уңай күрсәткечләре бар.”
Бәйрәмгә мәдәният хезмәткәрләре дә ныклап әзерләнгән иде. Алар быел билгеләп үтеләчәк истәлекле даталар — Бөек Ватан сугышында Җиңүнең, ТАССР төзелүнең 100 еллыгына багышланган концерт программаларын күрсәтте.
Бәйрәмдә авыл хезмәтчәннәреннән тыш, иң яхшы укытучыларга, табибларга да бүләкләр тапшырылды. Авыл җирендә тынгысыз хезмәт куйган бер генә һөнәр иясе дә бүләксез калмады.
Чаллы мэры Наил Мәһдиев: «Мин гел шаяртырга яратам, аның үзенә күрә асылы да бар. Чаллыда яшәүчеләр иртән йокыдан уянгач, КамАЗ автомобиленең тәгәрмәчен ашамаячаклар. Иң әүвәле икмәк кирәк. Икмәк булса, калган бар әйбер дә булачак.”
Тукай районы хезмәт алдынгылары бәйрәмендә 600ләп кеше катнашты. Аларның байтагына кыйммәтле бүләкләр, ә аеруча зур казанышларга ирешүчеләргә дәүләт бүләкләре тапшырылды.
