Табигатьне, җәнлекләрне саклау безнең изге бурыч.Мамадыш районында кыргый хайваннар өчен утлыклар урнаштыру һәм аларны тукландыру акциясе узды. Чараны Татарстанның Биоресурслар буенча дәүләт комитеты оештыра.
Атна дәвамында район урманнарындагы иске җимлекләр яңартылды, поши, кыр кәҗәсе, куяннар өчен тозлар куелды. Тулырак Мамадыш районыннан хезмәттәшләребез әзерләгән язмада.
Рузилә Минһаҗева кыргый хайваннарны тукландыру эше белән яхшы таныш. Аларның моңа кадәр дә урманнарга чыгып, җимлекләргә тоз салуда катнашканнары бар. Менә бүген дә, дәресләрдән соң, Шәдче урта мәктәбенең бер төркем укучылары педагоглар һәм белгечләр озатуында республика күләмендә узучы акциядә катнаштылар. Чара “Вятский берег” аучылык хуҗалыгында узды.
Хайваннар дөньясы объектларын файдалану һәм саклауны контрольдә тоту буенча Мамадыш районы бүлекчәсе җитәкчесе Ринат Шакиров сүзләренчә, әлеге чара хайваннарны саклау һәм үрчетү, шулай ук алар өчен уңайлы шартлар тудыру максатларында уздырыла.
Агач җимлекләр партояклыларга — югары, ә куяннарга түбәнрәк урыннарга куела. Андагы тозны һәр квартал саен яңартып торалар.
Бүгенге көндә Мамадыш районында 8 аучылык хуҗалыгы исәпләнә. Урманнарда кыргый хайваннар өчен мондый җимлекләрнең саны берничә йөздән артып китә.
