Буа элеваторында көзеннән кабул ителеп, тиешле дәрәҗәдә киптерелгән, сакланган орлыкны хуҗалыкларга озата башладылар. 100 тоннага кадәр төяп җибәрәләр. Ә моңа чаклы орлыклар җентекләп тикшерелә. Барлык партия орлыкларның тишелеше 92-95 процент тәшкил итә ди белгечләр. Бу турыда тулырак киләсе сюжетта карагыз.
Завод лабораториясендә бөртекләрнең дымлылыгын, чисталыгын, тишелешен, сәламәтлеге торышын һәм башка күрсәткечләрне ачыклау өчен барлык заманча җиһазлар бар. Һәр процедураны башкаруның бөтен нечкәлекләрен әйдәп баручы белгеч Рамилә Гыйбадуллина белә. Биредә ул инде 15 ел хезмәт куя.
Сертификацияләүгә анализ Тәтеш лабораториясендә үткәрелә. Ягъни, кулланучыга барып җиткәнче орлыклар җентекләп тикшерелә. Белгечләр чәчүлекнең сыйфаты буенча тулы гарантия бирәләр. Барлык партия орлыкларның тишелеше 92-95 процент тәшкил итә.
Чәчүлек алырга килүче машиналар агымы көннән-көн арта. 100 тоннага кадәр дә төяп җибәрәләр. Көненә 160 тонна орлык озату мөмкинлеге бар. Ләйсән Хәсәнова сүзләренә караганда, бу соңгы чик түгел.
Быел кар белән көрәшүгә дә күп көч куярга туры килгән. Склад яннарында кар катламы калынлыгы 1 метр 70 сантиметрга җиткән. Аны үз көчләре белән чыгарганнар.
Предприятиедә 60 кеше хезмәт куя. Әлегә бер сменада эшлиләр. Бүгенге көнгә орлыкның 80 проценты әзер. Аларны хуҗалыкларга озата башладылар инде.
Алсу Сәмигуллина, Ильнур Кадыйров. Татарстан яңалыклары
