Тәүлегенә 48 литр. Шундый югары продуктив сөтлебикә Буа районының Иске Мәртле авылында урнашкан “Акыллы ферма”да тотыла. Рекордлы сөт бирүче хайваннарның рационы һәм тотылу шартлары белән хәбәрчебез кызыксынды.
Менә ул товарлыклы-сөтчелек комплексында 4414 номерлы сыер. Продуктивлылык буенча әлеге хуҗалыкта гына түгел, район буенча да абсолют рекордчы. Тәүлегенә 48 литр сөт бирә. Иртә белән 25 литр, кич — 23. Тәүлегенә 35 литр бирүче төп масса сыерлар фонында бу бер ярым тапкыр зур күрсәткеч. Рекордчы сөтлебикәләрне әлеге тармакта 2018 елдан бирле эшләүче Ирина Хлынова сава.
Рекордчы-сыер голштин токымлы. Соңгы бозаулаганнан соң 14 мең литр сөт биргән. Аның майлылыгы 3,8 процент, андагы аксым микъдары 3,35 процент. Аннан сауган сөт белән биш чиләк диярлек тула.
Акыллы ферма директоры Булат Туктаров фикеренчә мондый югары продуктлылыкка балансланган ашату һәм дөрес көтү яңарту нәтиҗәсендә ирешелә.
Сүз уңаеннан, әлеге фермада 970 эре терлек асрала. Шуның 375 башы сыерлар. Бер сыердан уртача тәүлеклек савым 25 литр тәшкил итә. Ә егермеләп сөтлебикә кырык литрдан күбрәк сөт бирә.
Рөстәм Әхмәдуллин, Илнур Кадыйров, Татарстан яңалыклары.
