Районда ике түбән урнашкан күпер су астында калды. Болар Кыят һәм Бәбки авылларына керү юлындагылар. Беренчесенә әйләнгеч юл бар, Килдураз авыл җирлегенә кергән торак пунктка Зур Фролово һәм Каенлык авыллары ягыннан кереп була. Су күтәрелү урыннарыннан хәбәрчебез видеоматериалы.
Кыят авылы янындагы түбән урнашкан күпер өслегеннән су метр ярымга күтәрелгән. Һәм бу бер тәүлек эчендә. Мондый күренеш яз саен кабатланса да, авыл халкы ташу карарга дип бик шатланып килә. Чөнки хәзер су басу чорында да тормыш гадәти режимда дәвам итә.
“Волгадорстрой” оешмасы эшчеләре күпердә тәүлек әйләнәсе кизү тора. Алар өч сәгать саен су күтәрелү дәрәҗәсен тикшерәләр. Белгечләр ташуның быел ике атнага иртәрәк килүен билгеләп үтә.
Бәбки авылына керү юлы да ябык хәзер, биредә дә күпер су астында калды. Авылда бүгенгә 8 кеше яши, барысы да диярлек өлкән яшьтәгеләр. Язгы ташу галәмәтләрен ишетеп түгел, күреп белгән килдуразлылар моның хәстәрен алдан күргән.
Су басу куркынычы янаса да, район үзәге белән туры бәйләнеш өзелсә дә, авыл халкы ташуның әллә ни көчле булмавын билгеләп үтә. Бу элеккеге еллар белән чагыштырганда.
Ничек кенә булмасын, ташу чоры уяу булуны таләп итә. Әлеге дәвердә оператив төркемнәр тулы әзерлектә тора.
Алсу Сәмигуллина, Илнур Кадыйров, Татарстан яңалыклары.
