406 гаилә өчен 28 мең квадрат метрдан артык торак, газ, суүткәргечләр, тротуарлар, спорт, балалар мәйданчыклары. Боларның барысы да узган ел Татарстанда авыл территорияләрен комплекслы үстерү федераль программасы ярдәмендә эшләнгән. Масштаблы проектта берничә район катнашты. Ә Кукмара районы чыганаклардан файдалану буенча барысын да узып китте. Кукмарадан чираттагы репортаж.
Кукмара киез итекләре белән дан тота. Киез итекләрдә хоккей да уйныйлар. Абруй казанган киез итек комбинаты төзелгәнче үк, уңайлы итек басу белән биредә дистә еллар шөгыльләнгәннәр. Оныклары белән әбиләр дә бозда мавыгып уйный.
Купка авылындагы беренче хоккей тартмасын 20 ел элек агачтан ясаганнар. Ә узган ел биредә авыл территорияләрен комплекслы үстерү программасы буенча чын хоккей бозы барлыкка килде. Хәзер тирә-күрше, башка районнар авыллары командалары белән дә уйныйлар.
Бөтен авыл нәниләрдән алып өлкәннәргә кадәр хоккей уйный, җанатарлар да күп. Шундый хоккей мәйданчыклары районның башка авылларында да барлыкка килгән. Каенлык авыл җирлегендә өч грант акчасына ял итү зонасы, спорт мәйданчыгы, Бөек Ватан сугышында катнашучыларга яңа һәйкәл салынган. Кайбер эшләрне авыл халкы ярдәмендә башкарып чыкканнар.
Ядегәр авыл җирлегендә дә узган ел күп эшләнгән. Тротуарлар, ял итү урыннары, балалар мәйданчыклары ясалган.
3 процентлы ипотека Кукмара районында авылларның йөзен сизелерлек яхшыртырга, авыл халкының тормышын уңайлырак итәргә, заманча инженер инфраструктурасы булдырырга, транспортны яңартырга мөмкинлек биргән. Узган ел районда барлыгы 400 миллион сумлык 97 грант акчасы үзләштерелгән.
Татарстан авыл ипотекасын бирү күләме буенча лидер төбәкләр арасына керде. Бер мең 600дән артык гаиләне торак сатып алу өчен акча белән тәэмин итте. Авыл халкының яшәү шартларын яхшырту – өстенлекле юнәлеш. Авыл халкы тагын да яхшырак яшәсен, яшьләр авылларда төпләнеп калсын өчен проектларны быел да гамәлгә ашыралар.
Дмитрий Второв, Владимир Юрков, Илдар Сафиуллин, Татарстан яңалыклары, Кукмара районы.
