Республикада туган телләр һәм халыклар бердәмлеге елына багышланган чаралар дәвам итә. Актаныш районында мари халкының республикакүләм Семык бәйрәме дә бик күңелле матур узды. Бәйрәмнән Фәнис Мөхәммәтов репортажы.
Мари Суыксу авылында бу көнне кояш та яктырак булып, аерым балкып торды. Бәйрәмгә республика шәһәр-районнарыннан, күрше төбәкләрдән дә күп санлы кунаклар, фольклор коллективлары җыелган иде. Һәркемнең кәефе күтәренке, йөзләрдән нур бөркелде.
Семык бәйрәме быел республика күләмендә 25 нче тапкыр уздырылды. Кунаклар кайлардан гына килмәгән! Әгерже, Арча, Актаныш, Балтач, Кукмара, Мамадыш, Минзәлә, Менделеевск, Мөслим, Алабуга районнары, Казан, Яр Чаллы шәһәрләре, Марий Эл республикасы вәкилләре чыгышлары ямь өстенә ямь булды.
Кунаклар авылның мәдәнияте, милли ашлары, уеннар үткәрелә торган мәйданнары белән танышты. Шунда ук мариларның иҗат коллективлары чыгышлары, төрле кызыклы уеннар, ярышлар да үткәрелде.
Бәйрәмдә берьюлы ике урында сәхнә гөрләп торды. Беренчесендә килгән кунаклар җылы теләкләрен җиткерсә, икенче сәхнәдә “Мари гүзәле”, “Мари батыры” бәйгесе кызды, милли җырлар яңгырады, дәртле биюләр башкарылды.
Татарстан яңалыклары, Актаныш районы.
