Бүгенге яшьләрне, аерым алганда яшь гаиләләрне иң нык борчыган проблема – торак. Хәзерге вакытта үзеңнең хәләл көчеңә генә йорт салу, яисә фатир сатып алу бик авырга төшә һәм мөмкин эш тә түгел кебек.Әле дә ярый дәүләт ташламый. Яшьләргә ярдәм итү җәһәтеннән республикада һәм федераль күләмдә төрле программалар эшләп килә. “Торак” федераль максатлы программасы чикләрендә гамәлгә ашырылган сөенечле вакыйга ияләре 2023нче елга билгеле.
Бәйрәм ялларыннан соң кәефләргә хуш килерлек итеп район хакимиятендә тантаналы шартларда сигез гаиләгә торак шартларын яхшырту өчен сертификатлар тапшырылды. Алдагы елларда “Торак” федераль программасының мондый сертификаты районда елына берәр генә гаилә алып килгән булса, быел бу сан 8 булуы белән эре шәһәрләр, Казан күрсәткеченә җиткән.
Дәүләт ярдәме алуга төп шартларның берсе – гаиләнең торак шартларын яхшыртуга мохтаҗлыгы, шул ук вакытта субсидия алуга Саба районы территориясендә, балаларны да кертеп, даими яшәү урыны буенча теркәлгән гаиләләр генә исәп тота ала. Моннан тыш, ир белән хатынның яисә тулы булмаган гаиләдә бер ата-ананың яше 35 яшьтән артмаска тиеш. Даими эш урыны да таләпләр исемлегенә кергән.
Энҗе, Алмаз Әхтәмовлар Саба гимназиясе укытучылары. Хәзергә алар Мәгарифнең арендалы торагында яши.Үз йортларын сала башлаганнар. Эшне алга алып барырга дәүләт ярдәме бик вакытлы бирелә.
Әлеге акчаларны яңа төзелештәге яки икенчел торактагы фатир сатып алуга тотарга мөмкин. Шулай ук социаль түләүләрне йорт төзү өчен дә кулланырга рөхсәт ителә.
Хәзерге вакытта 2024нче елда субсидия алуга гаризалар кабул итү бара. Аларны торакка мохтаҗ барлык яшь гаиләләр дә бирә ала. Рәсми мөрәҗәгатьне 1нче майга кадәр тапшырырга кирәк.
Алия Галиуллина, Райлә Галәвина Айзат Шәрәфиев, Татарстан яңалыклары, Саба районы.
