Каты коммуналь калдыклар белән эш итүнең яңа системасы экологияне яхшыртуга юнәлдерелергә тиеш. Парламент комитетларының торак сәясәте һәм экология комитеты әгъзалары әнә шулай дип саный.
Саба районында Татарстанда каты коммуналь калдыклар белән эш итү реформасын законнар белән җайга салу проблемаларына багышланган «түгәрәк өстәл» булып узды. Каты коммуналь калдыклар белән эш итүнең яңа системасын нәтиҗәле гамәлгә ашыру өчен законнардагы үзгәрешләр таләп ителә. Аерым алганда, чүп савытлары мәйданчыгында урнаштырылган контейнерлар мәсьәләсе белән бәйле кануннарга өстәмәләр кирәк. Комитет башлыгы Азат Хамаев фикеренчә, халык белән турыдан-туры диалог булдыру мөһим.
Татарстан Республикасы Дәүләт Советының Экология, табигатьтән файдалану, агросәнәгать һәм азык-төлек сәясәте комитеты рәисе Азат Хамаев: «Иң мөһиме — халыкның реакциясе. Халык хупламаса, нинди генә үзгәрешләр булмасын, алар, һичшиксез, барып чыкмаячак. Каты коммуналь калдыклар белән эшләүче предприятиеләрнең бөтен эшчәнлеге экологияне, әйләнә-тирә мохитнең торышын яхшыртуга юнәлдерелергә тиеш.»
***
Очрашу тәмамланганнан соң катнашучылар Урман селекция-орлыкчылык үзәгендә һәм Нургали Миңнеханов исемендәге дендрология бакчасы эше белән танышты. Шулай ук бүген Лаеш районында “Кыр көне-2020” дип аталган кыр форматындагы эре күргәзмә эшен дәвам итә.
