Саба районы мәдәният йортында шаян, шук, күңел көрлеге таратучы студентлар катнашында “Студент Пати” чарасы узды. Командалар төрле номинациядә үз сәләтләрен күрсәтте. Кемнәр җиңүче дип табылды? Алдагы язмада.
Бәйге форматында барган чараны Тимершык, Шекше, Саба аграр көллиятенең иң яхшы егет-кызлары үзләре белән таныштырудан башлады.
Интеллектуаль бәйгедә яшьләр катлаулы сорауларга җавап тапты. Студент еллары-һәр кеше тормышында иң күңелле вакыт, киләчәккә нигез салына, өметләр чынга аша, зур казанышлар белән тулы тормыш көтә дигән өмет белән яшисең. Аның һәр көне үзенчәлекле, берсе икенчесенә ошамаган. Өченче турда студентлар менә шул бер көнне сәхнәләштереп күрсәтте.
Аграр көллият командасы студент белән профессорның юмористик диалогын сәхнәләштерде. Тимершыклар дәрес барышын һәм үзара аралашуны тәкъдим итте. Катнашучылар рәсем сәнгатендә дә сәләтле икәнлеген исбатлады. Милли мәдәниятләр һәм гореф –гадәтләр елының эмблемасын барлыкка китерүне зур фантазия белән башкарды.
Вальс, гитара белән җыр башкару, аерым чыгыш иҗади турны һәр команда лаеклы үтте.
Студент Патида жюри тарафыннан Саба аграр көллияте иң шаян команда, Тимершыклар иң тапкырлар дип танылды. Иң креатив команда исеменә Шекше яшьләре лаек булды.
Студент еллары әлеге бәйге сыман елмаеп искә алырлык мизгел. Шул ук вакытта кешене олы тормышка әзерләүче бер этап та. Районның киләчәге әнә шундый сәләтле, шаян егет-кызлары кулында.
Ләлә Зәйнуллина. Татарстан яңалыклары өчен Саба районыннан.
