Бу көннәрдә Татарстанның халык шагыйре Роберт Миңнуллинга туган авылы Башкортостанның Илеш районы Шәммәт авылында бюст һәм музей ачылды. Әлеге тантаналы чарага ике төбәкнең дә күренекле әдәбият, сәнгать әһелләре җыелды.
Музей элек укучылар саны җитмәү сәбәпле ябылган авыл мәктәбе бинасында эшли башлады. Музей булдыру өчен аны ремонтлаганнар. Биредә Роберт Миңнуллинга багышланган интерактив музей эшли. Берочтан әдипнең шәхси һәм иҗатташлары тарафыннан аңа бүләк ителгән китапларын, картиналарын туплаган китапханә-үзәк тә бар. Бюст Республика Рәисе каршындагы Татар телен һәм Татарстан Республикасында яшәүче халыклар вәкилләренең туган телләрен саклау, үстерү мәсьәләләре комиссиясе ярдәме белән куелган. Скульптура авторы — Тимофей Тюрин, ул шулай ук Казандагы Роберт Миңнуллин йортында урнаштырылган мемориаль тактаны да ясаган булган… Быел исән булса халык шагыйренә — 76 яшь тулган булыр иде.
