Республиканың зур шәһәрләрендә традицион көзге авыл хуҗалыгы ярминкәләре бара. Түбән Кама районы фермерлары ял көннәрендә яңа гына түтәлдән җыеп алынган яшелчәләрне сатып-алуны шәһәрдәге өч урында оештырган. Көньяк сәүдә үзәге янында, “Комета” һәм Бызов урамындагы базарларда сәүдә гөрләп бара. Ярминкәләрнең барышын Түбән Камадагы коллегаларыбыз да күреп кайтты.
Кәбестә -15, кишер — 25, суган өчен килограмына 18 сумнан 40 сумга кадәр сорыйлар. Авыл хуҗалыгы ярминкәсендә җирле җитештерүчеләр катнаша. Тик түбәнкамалылар билгеләп үтүенчә, быел бәяләр арткан. Фермерлар билгеләп үтүенчә, быел бәрәңге уңышы белән әллә ни куандырмаган. Шуңа да бәяләр узган ел белән чагыштырганда, кыйммәтрәк. Ә сораучылар күп. Икенче урында – суган, ул да киштәләрдән тиз китә икән. Кәбестәләр исә әлегә аз. Соңрак алып кайтырга вәгъдә бирделәр. Көзге авыл-хуҗалыгы ярминкәләре 13 ноябрьгә кадәр эшләячәк. Сатып-алу шәһәребезнең өч ноктасында оештырыла: Южныйдагы “Магнит” сәүдә үзәге тирәсе, “Комета” һәм Бызов урамындагы базарлар.
