Татарстан Президенты Рөстәм Миңнеханов Татарстанның берничә районына эшлекле сәфәр кылды. Түбән Камада экстрим-парк төзелеше барышы белән танышты. “Әйдә” дип аталган әлеге паркта ут баганалары, күп функцияле беседкалар һәм арт-галерея барлыкка килде. Спорт объектының гомуми мәйданы бер гектардан артык.
Шәһәрнең 34 нче микрорайонында тагын ике социаль мөһим объект барлыкка килә. 320 урынга исәпләнгән балалар бакчасы һәм 800 укучы өчен технологик лицей.
Шулай ук Рөстәм Миңнеханов Экопаркны карады. Әлеге паркта 35 сәүдә ноктасы эшли, 19 арендатор белән килешү төзелгән. Аларның унбере — җирле җитештерүчеләр.
Республика Президенты нефть химиясе һәм нефть эшкәртү колледжында булды, аның базасында Ворлдскиллз стандартлары буенча 2 нче тармак чемпионаты уза. Рөстәм Миңнехановка химия тармагының ике компетенциясе тәкъдир ителде.
Зәй районында Президент яңартылган балалар музыка мәктәбендә булды. Анда 270 тән артык бала белем ала. Шулай ук Рөстәм Миңнеханов «Безнең ишегалды»республика программасы кысаларында яңартылган ишегалларын карады.
Шул ук программа нигезендә Тукай районының йорт яны территорияләре төзекләндерелә. Бәтке авылында тәмамланган проект тәкъдим ителде.. Рөстәм Миңнеханов шулай ук аерым фәннәрне тирәнтен өйрәнү мәктәбендә булды, анда 426 бала укый. Уку елы башына алар өчен капиталь ремонт үткәрелде.
