Бүген 16 ноябрьдә бөтендөнья кул эшләре көне билгеләп үтелә. Киләсе видеоязмабыз Мамадыш районында яшәүче Кадрия Низамова турында. Ул изолоннан яктырткычлар ясау белән шөгыльләнә. Аның коллекциясендә курчак, чәчәк бәйләме, гөл савыты формасындагы өстәл лампалары да бар. Матурлыкны тудыручы оста белән Мамадыштагы хәбәрчебез Илнур Юнысов та очрашты.
Шаблон буенча кисеп алынган изолонны төзелеш фены белән җылыта да, үзенә кирәкле формага кертә. Кадрия Низамова болардан яктырткыч курчак ясаячак. Аның нигезе итеп плафон алына, шуңа кисемнәрне беркетеп чыга.
Изолоннан яктырткычлар ясарга Кадрия Низамова 1 ел элек керешә. Әлеге юнәлешне өйрәнүенә чәчәкләр яратуы сәбәпче. Башта өстәл лампаларын гөл савыты, чәчәк бәйләме формасында эшли. Изолонның ак, яшел, шәмәхә, кызыл төсләрен куллана. Барлык материалны да кибеттән сатып ала яки интернет аша заказ белән кайтара. Бер җиһазны ясау кимендә көне буена сузыла. Кул остасы хаман да эзләнүдә, яңалыкка омтыла, белемен камилләштерү өстендә эшли.
Кыска гына вакыт эчендә сюжет герое ясаган эшләнмәләр берничә дистәдән артып китә. Ул аларны бүләк итеп тә, заказга да башкара.
Ә бу Кадрия Низамованың кызы Алисә. Әнисенең кул эшләренә осталыгы аңа да күчкән. Моннан бер ел элек үзмәшгуль булып теркәлә, дәүләттән 75 мең сум күләмендә ярдәм ала һәм үз эшен башлый. Алисә кондитер эшләнмәләре пешерү һәм фуд-флористика белән шөгыльләнә.
Дәүләт ярдәмен Алисә суыткыч һәм электр плитәсе алу өчен кулланган.
Илнур Юнысов, Тимур Мөхәммәтханов, Фаил Шәйхетдинов.
