Республикада махсус хәрби операөиядә катнашучыларга төрле ярдәм күрсәтү дәвам итә. Кукмара районы да әлеге игелекле эшкә инде күптәннән кушылды. Районның Сабанчы авылының битараф булмаган кешеләре бергә җыелып, маскировка челтәрләре үрә, оекбашлар, бияләйләр бәйли. Чираттагы гуманитар ярдәмне әзерләүдә Кукмарадагы хәбәрчебез Миләүшә Хаҗиева дә катнашты.
Татар халкының милли җырлары, җылы һәм рәхәт авыл мохите. Сабанчы авылында яшәүче хатын-кызлар бергә җыелса, аларның көннәре шулай уза. Көннән-көн районыбызда махсус хэрби операциядә катнашучы солдатларга ярдәм итәргә теләүчеләр саны арта. Әлеге эштән бу авылның битараф булмаган кешеләре дә читтә калмаган. Бүгенге көндә алар токмач кисү белән мәшгуль. Соңгы тапкыр хәрбиләргә 30 коробка өй ризыгы җибәрелгән.
Гадәттә хатын-кызлар атнага 3 тапкыр кунакчыл хуҗабикә Әнисә Гайфетдиновада яки мәдәният йортында җыелалар. Аларның шулай ук махсус төркемнәре дә бар, биредә хәрбиләргә һәрьяклап ярдәм итү мәсьәләләре турында фикер алышалар. Токмач әзерләү белән беррәттән, Сабанчы авылында яшәүче хатын-кызлар җылы йон оекбашлар һәм бияләйләр бәйлиләр.
Сабанчы авылында яшәүче хатын-кызлар инде берничә тапкыр махсус хәрби операция зонасына җылы киемнәр җибәргәннәр. Күптән түгел генә алар тарафыннан 50 пар носки һәм 30 пар бияләй бәйләнгән. Хатын-кызларның һәр очрашуы җылы мохиттә уза, анда алар гуманитар ярдәм әзерләү белән бергә безнең сугышчылар өчен дога кылырга да онытмыйлар. Тиздән яратып әзерләнгән йорт ризыгы һәм бәйләнгән йон киемнәр фронтка чираттагы гуманитар ярдәм белән җибәреләчәк. Аларның барысы да хәрбиләргә туган якларын, әти йортын һәм җылы әни кулларын искә төшерергә бер сәбәп булачак.
Миләүшә Хаҗиева, Марат Сабирҗанов, Татарстан яңалыклары өчен Кукмара районыннан.
