Чишмәләр элек-электән авылның күрке, яшәеш чыганагы булган. Халык күңелендә алар белән бәйле күпме хатирә саклана, җырлар җырлана.Шушы көннәрдә генә Саба районының Кече Кибәче авылында, Гарәфетдин исемен йөртүче чишмә ачу тантанасы булып узды.Бу авыл кешеләренең күптәнге хыялы иде.Чишмә ачу тантанасыннан безнең киләсе репортаж.
Дөньяда чишмә җырыннан матуррак җыр, аннан да тәмлерәк су юктыр. Кече Кибәче авылындагы әлеге чишмә озак еллар үзенә сукмак салганны көткән. Ниһаять, шушы авылда туып үскән “Татавтодор” акционерлык җәмгыятенең Саба филиалы директоры Марат Гарипов, аның туганнары һәм авыл халкы ярдәме белән чишмә сафка басты.Аңа ни өчен Гарәфетдин исеме бирелүенең серен бәйрәмне алып баручылар ачты. Кече Кибәчедә туып-үскән Гарәфетдин Гарипов исән чагында авылның үз чишмәсен булдыру теләге белән янып йөргән. Бу хакта чишмәләр телен аңлаучы дусты Рифкать Шәфыйков белән дә киңәшләшкән. Тик,кызганыч, ул изге хыялын тормышка ашыра алмый кала. Гарәфетдин абыйның васыятен улы Марат Гарипов үти. Азан әйтелгәннән соң чишмәнең ае куелып, исеме беркетелде.
Чишмәне барлык шартын туры китереп, кызыл тасмаларны кисеп ачтылар. Буыннар чылбырын тоташтыручы чишмә суын Марат Гариповның улы Булат кабул итеп алды.
Авылдагы чишмәләр тарихын өлкәннәрдән дә яхшырак белүче юк. Шушы авылда туып үскәнФалиянур Нигъмәтҗанова суга тилмереп яшәгән вакытларыняхшы хәтерли.
Күпердән 250 метр өстәрәк, тирән елга эченнән агып чыккан суны йортларга якынайту турында узган елда уйлана башлыйлар. Шактый мәшәкатьле килеп чыгачагы ачыклана. Ләкин барлык авырлыклар артта кала һәм җир астыннан чыккан су шланглар ярдәмендә чишмәгә үз агымы белән килә торган итеп көйләнә. Суы әйбәт, анализ күрсәткечләре дә яхшы. Алда әйтелгәнчә, башта үзара салым акчасына агачлар киселеп, тирә-юнь тәртипкә китерелә. Аннан соң иганәчеләр ярдәме белән чишмәне ачу эшләре башланып китә.
Чишмә иң яхшы материаллардан эшләнгән, киләчәктә яр кырыйларына таш түшәлеп, тагын да матурлау максаты тора. Бәйрәм кунакларына мул табын артында, кайнар коймак белән чәй эчертү дә күңелле күренеш булып истә калды. Гәрәфетдин чишмәсе җиргә бәрәкәт, илгә иминлек теләп, мәңге челтерәсен.
Гөльназ Вахитова, Рөстем Хәлилов.