Саба районы Юлбат авылында күп балалы гаиләләргә бирелгән җир кишәрлегендә яңа газүткәргеч файдалануга тапшырылды. Авылдагы 37 йортны табигый газга тоташтыру мөмкинлеге барлыкка килде.
Мәктәп урамында яшәүчеләр моңа кадәр үз йортларын аена 10 мең сум чамасы акча түләп, электр белән җылытты. Ике йортка газ ил Президенты Владимир Путинның социаль газлаштыру программасы буенча кертелгән. Аның буенча шәхси йортларда яшәүчеләр җир участогы чигенә җиткерелгән газүткәргеч өчен түләми. Йорт хуҗасы үз хисабына эчке эшләрне генә башкара. Быел социаль программа буенча республикада 1700 йортны газга тоташтыру планлаштырыла.
