Республика фермерлары кәбестәнең соң өлгерә торган сортларын җыярга кереште. Ел коры килсә дә, яшелчәнең уңышы яхшы. Моңа заманча технологияләр булышкан. Буа районыннан репортаж.
Буа районы хуҗалыкларында кәбестәнең соң өлгерә торган сортларын җыялар. Быел кәбестә үстерү өчен табигать шартлары уңайсыз булса да, крестьян-фермер хуҗалыклары сугарулы мәйданнарда яхшы уңыш үстерделәр.
Монда кәбестә мәйданы зур түгел — ике гектар гына. Эре күчәннәр дә, ваграклары да күренә. Уңыш начар түгел.
Буа районында иртә, уртача срокларда һәм соң өлгерә торган кәбестәләрне үстерәләр. Иртә өлгергән кәбестә уңышын җәй көнне үк сатканнар. Фермер Айрат Сабирҗанов дым җитмәү шартларында да яхшы уңыш үстергән.
Кәбесстәне җыеп алганнан соң, складларга урнаштыралар. Соңрак килешү нигезендә, сәүдә урыннарына озаталар. Кәбестәне сортына карап, килосын якынча 17-18 сумга саталар.
Камилә Мусина, Гакил Камалетдинов, Татарстан яңалыклары, Буа районы.
