Йон эрләү – бүгенге көндә инде кулланыштан төшеп калган диярлек, онытылып баручы кул эше. Болын-Балыкчы авылында яшәүче Әминә Хисамова исә әле һаман кулыннан орчыгын төшерми. Моннан 40 ел элек ире ясап биргән кабага йон элеп, буш вакыты булган саен эрли ул. Җептән башмаклар, оекбашлар бәйли. Аларны якыннарына, авылдашларына бүләк итә.
Каба ул йон эрләү җайланмасы. Болын-Балыкчы авылында яшәүче Әминә Хисамованың төп эш коралы. Аны ясаганга инде 40 елдан артык вакыт үтсә дә, ул әле бүген дә хуҗасына тугры хезмәт итә. Әминә апа еш кына кулына орчыгын алып аның янына ашыга- вакыт та тиз уза, эшенең нәтиҗәсе дә күзгә күренеп арта.
Хисамовлар сарыкларны үзләре асрый. Әминә апа аларның йоныннан җеп эрләп, оекбашлар, башмаклар бәйли. Һәм якыннарына, авылдашларына бүләк итә. Мобилизацияләнгән ир-егетләрне дә читтә калдырмый. Аларга да ярдәм йөзеннән үенең күңел җылысын кушып бәйләгән башмакларын, оекбашларын җибәрә. Бүген аларның дә олы уллары махсус хәрби операциядә катнаша. Әминә апа йон эрләргә кияүгә чыккач өйрәнә. Инде моңа 40 елдан артык вакыт үткән. Ул хәзер тәмам остарып беткән. Орчык кулында биеп кенә тора.
Әминә апа да аның тормыш иптәше Минвәли абый да – чын хезмәт кешеләре. Хуҗалыкларында әле бүген дә күпләп мал-туар тоталар. Икесе дә гомер буе фермада эшләгән.
Әминә апа йон да эрли, бәйли дә, мунчалалар да үрә. Хуҗалыкта мал-туар карауда да булыша. Эшләрен тәмамлаганнан соң, таякларын тотып урамга йөрергә чыга. Аның күзләрендә hәрчак булганына шөкер итә белү һәм иртәгәсе көнгә ышаныч чагыла. Алга таба да шулай сөенеп яшәргә язсын иде дип телик бу матур күңелле гаиләгә
