Солдатларга сәлам булып барсын: Мамадышның “Кайтаваз” агитбригадасы район авылларында хәйрия концертлары оештыра. “Изгелеккә бер адым” дип исемләнгән чарадан кергән акчаларны сәхнәдән үк мобилизацияләнгән ир-атларның гаиләләренә тапшыралар. Җирле халык бу тамашаларны ничек кабул итә? Чыгышларда нинди темалар өстенлек итә? Моны безнең иҗат төркеме белде.
“Туган ил” җыры залдагы тамашачыны моң дәрьясына алып керә. Аның һәр сүзе Ватанга мәхәббәт хисе белән сугарылган. Гомумән, “Изгелеккә бер адым” дип исемләнгән хәйрия концерты тулысынча шушы теманы күтәрә. Репертуарны туган якка, туган җиргә мәхәббәт турындагы җырлар алып тора. Ата-ана, балага булган кадер-хөрмәт, мәхәббәт турында да чыгышлар бар.
Кайсы авылга гына барсак та, дулкынланып барабыз. Тамашачы безне бик тә җылы кабул итә. Кулларыннан килгәнчә, үз өлешләрен кертергә тырышалар. Алай гына да түгел, бүгенге көндә читтә яшәүче якташларының да акчалата ярдәм итү очраклары булды.
“Кайтаваз” агитбригадасы хәйрия концерты белән Никифорово, Көмеш Күл, Югары Ушма һәм Көек-Ерыкса авылларында булырга өлгерде. Билет бәясе 150 сумны тәшкил итә. Барлык җыелган акча шушы җирлектән мобилизацияләнгәннәр санына бүленеп, азактан сәхнәгә аларның якыннарын чакырып тапшыралар. Тормыш иптәшенең энесе мобилизациягә эләккән Алевтина Петрова сүзләренчә, Мамадыш сәнгать осталарының бу адымы зур хөрмәткә лаек.
Бу чыгышларыбыз солдат егетләргә сәлам булып барсын. Аларның туган якларына исән-сау кайтуларын көтеп калабыз. Чын күңелдән чыккан теләк инде бу. Гади генә сүзләр түгел. Шушындый чорда һәркемнең эшләгән эше, әйткән сүзе бик мөһим дип саныйм.
Сәнгать осталары 15нче декабрьгә кадәр әлеге хәйрия концерты белән район авылларын әйләнеп чыгарга планлаштыра.
Илнур Юнысов, Фаил Шәйхетдинов, Тататарстан яңалыклары, Мамадыш районы.
