Авыл хуҗалыгы һәм азык-төлек министрлыгы үткәргән “Иң яхшы комбайнчы” республика бәйгесендә Актаныш районыннан унөч комбайнчы җиңү яулады. Игенчеләрне хөрмәтләп, район башлыгы рәхмәт хатларын тапшырды. Президент фатихасы белән комбайнчылар ярышы дүртенче ел рәттән оештырыла.
Ярыш шартлары җиңелләрдән түгел. Кыр батырларын, кем әйтмешли, кыл иләктән иләп, кабат-кабат тикшереп, ачыклыйлар. Иң югары күрсәткечләргә ирешкән 200 комбайнчының унөче – Актаныш вәкилләре. Бу гаҗәп тә түгел, чөнки район быел 200 мең тонна икмәк җыеп алды. Бу республикада иң югары күрсәткечләрнең берсе.
Ике айга якын барган бәйгедә республикадан унбиш меңгә якын комбайнчы катнашкан. Урып-җыю чорында Авыл хуҗалыгы һәм азык-төлек министрлыгы белгечләре районнар буенча көндәлек мониторинг алып барды. Урак тәмамлангач, урыннарга барып, күрсәткечләрне тагын бер кат чагыштырдылар.
Кыр батырларына100 әр мең сумлык премия бирелде. Хәзер алдынгы игенчеләр комбайннарны көйләп, кышкы саклауга кую белән мәшгуль. Үз алларына зур максатлар куеп, киләсе язны көтеп яшиләр.
Фәнис Мөхәммәтов, Ләйсән Газизова, Актаныш районы мәгълүмат үзәге.
