Республикада урак барлык мәйданның яртысыннан артыгында тәмамланды. Хәзер урып-җыюның иң катлаулы этабы. Көчле яңгырлар яуганнан соң, кайбер урыннарда башаклар җиргә ауды. Бөртекне югалтуларсыз җыеп алу игенчеләрдән зур осталык, түземлек таләп итә. Һәр гектардан уртача 38 центнер ашлык җыела. Лидерлар өчлегендә Зәй, Сарман һәм Тәтеш районнары. Тәтеш районында икмәк өчен көрәш төнгә кадәр бара. Кырдан репортаж.
«Бакырчы» хуҗалыгында 5 мең гектардагы сөрүлек җирдә бөртеклеләр, рапс, көнбагыш игәләр. Мул уңыш өлгерде, тик кыен һава шартларында бөртекне югалтмыйча җыеп алуы бик кыен, диләр игенчеләр.
Раил Гайнетдинов, яшь булуына карамастан, стажлы комбайнчы. Техниканы яхшы белә, механизмнарны гел тикшереп тора. Хәзерге шартларда бөртекне югалтуларсыз җыеп алу өчен бик аз тизлек белән суктыру мөһим. Ә вакыт төнгә якынлаша.
Егетләрнең йөзләрендә арыганлык сизелсә дә, бирешергә җыенмыйлар. Минутның да кадерле чагы.
Бакырчы хуҗалыгында көзге чәчү дә бара. Ә бу егетләрнең кайберләре республика яшь комбайнчыларының «Хезмәт кешесен данлыйбыз» дигән 12 нче республика конкурсы финалына чыгарга дәгъва итә. Конкурсны безнең телерадиокомпания республика авыл хуҗалыгы һәм азык-төлек министрлыгы белән бергә уздыра.Урак тәмамланганнан соң, октябрьдә яшьләр арасында абсолют лидерны билгеләячәкләр.
Дмитрий Второв, Ренат Сәхибгәрәев, Татарстан яңалыклары, Тәтеш районы.
