Киләсе видеоязмабыз Актаныш районының Колын авылында гомер итүче Фәндәлия Габдуллина турында. Аның язмышына битараф булмаган авылдашлары, күпләргә үрнәк итеп куярлык гамәл кылганнар.
Картаймыш көнендә ул берьялгызы. Балачакта ук әтисез кала. Әнисе, хәтта бертуган энесе дә күптән гүр ияләре. Сөенечкә, Авыл Советы, күрше тирәдәгеләр аның язмышына битараф калмый. Каршында гына хуҗасыз йорт бар, шунда күчергә ярдәм итәләр. Ремонт ясап, биредә барлык шартларны тудыралар.
Өлкәннәр көненә яңа йорт Фәндәлия апа өчен зур һәм көтеп алынган бүләк була. Ярдәм иткән һәркемгә рәхмәттән башка сүзе юк.
Райондашыбызның бүгенге көндә зур терәге — социаль хезмәткәр Кифая Сираева. Кибеткә барып азык төлек алып кайта, йорт тирәсен җыештыра, кыш көннәрендә карын көрәп тора. Күршедән су да алып керергә туры килә. Бу — Яңа йортта чишелми калган бер генә мәсьәлә. Якын киләчәктә моны да хәл итәргә тырышабыз ди, бу ярдәмне оештыруда зур өлеш керткән район инвалидлар оешмасы җитәкчесе Фәйрүзә Разетдинова.
Альбина Солтанова, Татарстан яңалыклары, Актаныш районы
