Игенчеләр язгы кыр эшләренең башлануын көтә. Актаныш районында кыр эшләренә әзерлек көзен уңышны җыеп алып, амбарларга урнаштыргач ук, башланган иде. Актаныштан безнең репортаж.
Язның бер көне елны туйдыра. “Башак” хуҗалыгы игенчеләре әлеге гыйбарәгә тугрылыклы. Район хуҗалыклары җитәкчеләре, агрономнар, инженер-механиклар биредә узган күргәзмә семинарда ел дәвамында ирешелгән уңышлар, яңартылган техника-машина паркы, терлекчелектә төзелеш барышы белән танышты.
“Башак” хуҗалыгында сыерлардан көнлек савымны 20 тоннага җиткерүне максат иткәннәр. Илүс Ярмиев хуҗалык белән икенче елын гына идарә итсә дә, үзгәрешләр, үсеш саннары күз алдында. Семинарда катнашучылар машина-торактор паркында, орлык складларында, тегермәндә булып, яңалыкларны күргәч, ак көнләшү белән көнләшүләрен яшермәделәр.
Хуҗалыкта сыерларда лейкозны бөтенләй бетерү чаралары да күрелгән. Сөт җитештерүдә алдынгылыкка чыгу белән беррәттән, сәламәт маллар асрау турында да җитди кайгырталар.
Ләйсән Газизова, Актаныш районы мәгълүмат үзәге.
