“Авылда да акча эшләп, рәхәтләнеп яшәп була”,- диләр Әҗемнән Илназ һәм Илсөяр Гайнетдиновалар. Алар үз көчләре, тырышлыклары белән ныклы хуҗалык булып гомер итә. Бүгенге көндә 38 баш терлекләре бар. Шуларның егермесе герефорд дигән ит бирә торган токымлы маллар. Әлеге эшчән, тырыш гаилә хакында тулырак итеп Гөлназ Вәлиева сөйләр.
Тормыш-көнкүрешеңне ныгытыйм, табынны мул итим дисәң, алны-ялны белми көч түгәргә, тир тамызып эшләргә кирәк. Әҗем авылында яшәүче Гайнетдиновлар гаиләсе хезмәттән бер дә курыкмый. Алар 2017нче елдан бирле шәхси хуҗалыкларында үз тырышлыклары белән күпләп мал-туар тота. Бүгенге көндә 38 баш терлекләре бар. Шулар арасында савым сыерлары, төрле зурлыктагы бозаулар, үгезләр, таналар асрыйлар. Герефорд дигән ит токымлы малларга аеруча өстенлек бирәләр.
Илназ Гайнетдинов.
Бүгенге көндә терлекләрнең күбесе ачык һавада, көтүлеккә йөртеп ашатыла. Малларны гаилә белән бергә карыйлар. Биредә балалар да кече яшьтән үк хезмәт тәрбиясе ала. Алар эш белән чыныгып үсә.
Әлбәттә, хуҗалыкта маллар күп булгач, аларга азык та шактый кирәк. Гаилә башлыгы тырыш, уңган Илназ җир эшкәртү, терлек азыгы әзерләү өчен, үзләренә техникалар да сатып алган.
Илназ Гайнетдинов.
“Эше барның, ашы бар”,- дип юкка гына әйтмиләр. Сөт тә, ит тә мулдан Гайнетдиновлар хуҗалыгында. Бергә-бергә кулга-кул тотынышып, хезмәттән ямь, тәм табып эшли һәм яши алар.
