Буа районы, Зур Кырлаңгы авылы янындагы чишмә бүген чын — чынлап ял итү урынына әверелгән. Әлеге авылда туып-үскән абыйлы — энеле Ринат һәм Рафаль Халиковлар моннан егерме ел элек ташландык чишмәне тазартып ачканнар. Ел саен аның тирәсен төзекләндерә килләләр. Бүген тәмле су чыганагы тирәсендә эскәмияләр, рәшәткәләр, аш-су әзерләү урыннары барлыкка килгән. Әлеге матурлыкны хәбәрчебез дә күреп кайтты.
Әлеге торбалар буенча килүче саф чишмә суы Буада иң тәмле суларның берсе, диләр. Камышлар үскән урында урнашкан чыганакны 2001нче елда Рафаэльның абыйсы Ринат күреп ала. Тирә – якны чистарта, тимер кисмәк китереп утырта. Аңа уртанчы энесе Рафаэль да булыша башлый.
Туганнарга ярдәмгә хәйриячеләр дә килә. Бигрәк тә алар эшмәкәр Ирек Хәйруллинга рәхмәтле. Халык сәдака акчасы да калдыра. Абый һәм эне исә җыелуган ярдәмгә, үз акчаларын да кушып, эш кораллары алып матурлауга керешәләр.
Тәмле су алырга килүчеләрне чишмә янындагы патриот почмагы да җәлеп итә. Үз вакытында чик буе гаскәрләрендә хезмәт иткән Рафаэль Халиков. армия фотоларыннан кечкенә баннерлар урнаштырган. Бирегә килүчеләр чик сакчысы формасында фотога да төшә алалар.
Кыскасы, бирегә килүче һәркем рәхәтләнеп ял да итә, чишмә суын эчеп, рухи канәгатьлек тә алып китә. Тирә – якны алга таба да төзекләндерү өчен теләүчеләр рәхмәт йөзеннән сәдака гына калдыралар.
Алия Галиуллина, Илсөяр Мөхәммәтҗанова, Сирин Хәсәнов, Татарстан яңалыклары, Буа районы.
