2021 ел Россия Федерациясендә Фән һәм технологияләр елы дип игълан ителде. Тормышыбыз алга барган саен , яшәешебезгә фәнни технологияләр күбрәк утеп керә. Моны Cаба районының Сатыш мәдрәсә музее мисалында да күрергә мөмкин.
Үз заманы өчен мәгърифәт үзәкләренең берсе булган Сатыш мәдрәсәсә яңарыш кичерә. 2016 елда мәдрәсә бинасы төзекләндерелгәннән соң, тарих белән кызыксынучыларны кабул итә башлый. Мәдрәсә музее ике залдан тора, икесендә дә заманча технологияләр кулланыла.
Менә Сатыш мәдрәсәсенең макеты. Шәкертләр тырышып сабак ала. Мичкә ягылган. Куыклы лампалар кабызылган. Макет яныннан аерылып китәсе дә килми. Барысы да чынбарлыктагы кебек. Өстәлләрдәге планшетларга кагылу белән документлар ачыла. Интерактив тактада гарәп шрифтлары белән язарга өйрәнеп була. Монда язучы Мөхәммәт Галинең китаплары да урын алган. Күренекле дәүләт эшлеклесе Рәүф Сабиров та шунда белем алган. Кыскасы, экспонатлар шәхеснең йөзен тулысынча ачып бирә. Мәдрәсә музее – авылның йөзек кашы, горурлыгы.
Фаил Шәфигуллин Сатыш авыл җирлеге башлыгы
Икенче залда заманча технологияләр ярдәмендә Оренбург, Уфа, Казанда эшләп килгән мәдрәсәләр турында стендлар әзерләнгән. Саба районы картасындагы авыл исеменә төймәгә басу белән, авыл, аның мәчете турында мәгълүмат чыга, мәчетнең эчке күренеше экранда яктыртыла. Бу залдагы стена гади генә түгел. Монда тәүлекнең теләсә кайсы вакытында Мәккә шәһәренең изге урыннарыннан туры трансляция тапшырып була.
Гүзәл Сафина Сатыш мәдрәсәсе музее җитәкчесе
Сатыш мәдрәсәсе 1800 елдан алып 1918 нче елга кадәр эшли. Заманында 300 шәкерт укыган. Мәдрәсә бинасы — XIX гасыр азагы — XX гасыр башы архитектура һәйкәле, төбәк әһәмиятендәге мәдәни мирас объекты. Музей ишекләре һәркемгә дә ачык. Биредә чал тарих белән замананың соңгы казанышлары кисешә һәм шуның белән игътибарны үзенә җәлеп итә.
Фәнис Мөхәммәтов, Татарстан яңалыклары, Саба районы.
