Быел Татарстан аграрийлары дәүләттән 13 миллиард сумнан артык акча алачак. Ул нигездә кече хуҗалыкларны үстерүгә тотыла.
Бу хакта Чирмешәндә авылның эшлекле активлыгын арттыру буенча зона киңәшмәсендә сөйләштеләр.
Республиканың иң яхшы 100 фермер, шәхси ярдәмче хуҗалыклар, авыл җирлекләре башлыклары, авыл хуҗалыгы кооперативлары рәисләре конкурсына да йомгак ясалды. Җиңүчеләр бүләкләр һәм акчалата премияләр алды.
Татарстанның көньяк-көнчыгышындагы 10 районыннан килгән катнашучылар җирле тәҗрибә белән уртаклашты.
«Чирмешән» авыл хуҗалыгы кооперативы биш ел элек республика грантын алган, хәзер ул заманча сугым цехы булган, ярымфабрикатлар җитештерүче күәтле предприятие.
Ә секцияләрдә авылларның агымдагы һәм шактый катлаулы проблемалары турында җентекләп фикер алыштылар.
Республика элеккечә сөт саву буенча илдә алда бара, бәрәңге, терлек һәм кош ите җитештерү буенча икенче урында тора. Авылларга ярдәм итү мәсьәләсе Президентның даими контролендә тора. Көнбатыш санкцияләре шартларында да, төрле программалар да нәтиҗәле эшли.
