Август ае — файдалы һәм тәмле яшелчә, җиләк-җимешләр өлгергән чак. Киләсе видеоязмабыз — Буа районының Яңа Тинчәле авылыннан Мифтахетдиновлар гаиләсе турында. Аларның хуҗалыгында нинди генә уңыш җыймыйлар – карлыганнан алып бөртекле культураларга кадәр. Буадагы хәбәрчебез Рөстәм Әхмәдуллин фермерларның бакчасында һәм иген кырларында булып, андагы эш барышын күреп кайтты.
Каршыбызда илле гектарлы карлыган һәм ун гектарда кура җиләге бакчасы. Бүген биредә карлыган җыю белән мәшгульләр. Көнгә унбиш тоннага кадәр туплыйлар. Уңышның туксан сигез проценттан күбрәген машина җыя, калганын кул белән өзәләр. Уңыш былтыргыдан кайтышрак.
Эшче куллар да җитми. Фермер гаиләсе күп эшне үз көче белән башкара. Дөрес, туксанынчы еллардан бирле тугры калып даими эшләүчеләре дә бар. Хәтта якын чит илләрдән килүчеләр дә хезмәт куя биредә. Кадим Солтанов Узбәкстаннан. Карлыган җыюда алтынчы сезон эшли.
Күп еллык фермер стажлы Мифтахетдиновлар бакчачылык белән соңгы җиде елда шөгыльләнә. Иртә, уртача, соң өлгерүче сортлар утыртканнар. Гектарга 5-6 мең төп үсенте туры килә. Куакларны тәрбияләү серләрен дә яхшы беләләр.
Мифтахетдиновларның кызлары Эльвирага караган күрше басуларында икенче урак – бөртеклеләрне суктырып җыялар. Биләмәдә уҗым бодае, арпа, язгы бодай, борай. Хәзерге вакытта көзге бодайны урып җыю бара.
СНХ Расыйх Мифтахетдинов “Шәвәлиева” Крестьян фермер хуҗалыгы баш агрономы
Ә бакча һәм кырлар уңышын урнаштыруны фермерлар күптән хәл итеп, планлаштырып куйган.
Рөстәм Әхмәдуллин, Илнур Кадыйров, Татарстан яңалыклары
