Бу көннәрдә Буа районының Килдураз авыл җирлегенә кергән дүрт авылда да юллар салына. Барысы да үзара салым акчасы хисабына. Аларда яшәүчеләр авылларны шул рәвешле тернәкләндерү мөмкинлегенә сөенеп бетә алмый. Чираттагы репортаж шул хакта.
Килдуразлылар үзара салым акчалары җыелуга аларга башкарыласы эшне һәм аның нәтиҗәләрен көтә башлаган иде. Аны җан башына 500 сум күләмендә җыйганнар. Хәзер, әнә, әле бер, әле икенче урамда таш юллар өелүгә шатланып бетә алмыйлар.
Рәшит Хәбибуллин, авылда яшәүче: “Менә, Аллага шөкер, без Гагарин урамында торабыз, Гагарин урамының бетте дисәк тә була. Аның бер өлеше калды. Иске Лашчы авылы ягында, Ленин урамында бөтен урам буе белән төзелеп бетте, Аллага шөкер. Инде калган көннәрдә дә безнең хәзер тагын Лашчы ягында Татарстан урамы, Муса Җәлили урамы бетте кебек, инде Фатыйх Кәрим урамын әз генә тоташтырасы калды”
Кадим Мөбәрәкшин, авылда яшәүче: “Һәм инде күрәбез менә юлларыбыз, шөкер, ясап бетерделәр, дип әйтергә кирәк. Һәм инде күрәбез, тигезләделәр. Бик матур чыкты дип әйтәм. Ә инде торышын вакыт күрсәтер. Һәм мин ышанам вакытка да бу юлларыбыз бирешмәс, диеп”
Авыл җирлегенә барлыгы җиде авыл карый. Шуларның дүртесендә быел 1 чакрымнан күбрәк арада таш өслекле юл салына. Эшләрне МППЖКХ оешмасы эшчеләре башкара.
Килдураз авыл җирлеге башлыгы Зөлфәт Әхәтов: “МППЖКХның эшен халык үзе карап, тикшереп торды. Һәркемнең үзенең мәнфагате бар, үзенең урамына салынганлык белән. Алар бу оешма эше белән канәгать, юллар яхшы булды. Үткән елларга да дәгъва юк. Юллар әйбәт.Бүгенгесе көнгә юллар салу төгәлләнеп килә. Күп калмады. Казма дигән авылда бетереп юллар ясалып бетә, тагын бер-ике елдан шушы авылларда да бетәр, дип өметләнәм”
Авыл җирлегендә әлеге үзара салым средстволарына башка яңарту эшләре дә башкарыла.
Килдураз авыл җирлеге башлыгы Зөлфәт Әхәтов: “Бәбки дигән авылда чишмә яңартылды, Кабалан дигән авылда зиратка сарай ясала. (Монардан башка да бик күп эшләр башкарыла. Рәхмәт Президентыбызга республикада шундый күп программалар булуына. Бүгенгесе көндә спорт мәйданчыгы ясала, өч авылга яңадан урам утлары кертелде, шундый эшләр”
Юллар яңартылып беткәч, авылларда зират өсләрен карарга планлаштыралар.
Алсу Сәмигуллина, Гакыйл Камалетдинов. Татарстан яңалыклары.
