Авыл хуҗалыгында киләсе сезонга әзерлек башланды. Хәзер техниканы, тагылма агрегатларны ремонтлау бара. Буа районының “Авангард” агрофирмасы остаханәсендә дә кызу эш кайный. Эшнең барышын Буадагы коллегаларыбыз да күреп кайтты.
“Авангард” агрофирмасында 10 елга якын хезмәт куючы Дмитрий Сидоров комбайнда һәм “Туман” үзйөрешле сиптергеч белән идарә итә. Берсен инде кышкы саклауга куйган, хәзер икенче тимер атын ремонтлау эшләре белән мәшгуль.
Дмитрий Сидоров, механизатор: “Туман”ның йөреш өлешен карадым, чылбырларын алыштырырга, майларга кирәк. Язгы кыр эшләренә техника тулы әзерлектә чыксын өчен тиешенчә ремонт үткәрәбез”
Агрофирмада 116 данә трактор, 25 комбайн бар. Төрле техника ремонтлау өчен ике аерым бина каралган. Ремонт эшләре билгеләнгән график буенча үткәрелә.
Хуҗалыкта техника саны елдан-ел арта һәм заманалаша бара. Аның торышына карап берничә төрле ремонт эшләре башкарыла.
Бөртек җыю комбайннары, тракторлар барысы да газ белән җылытылган гаражларда ремонтлана. Шунда ук гарантиядә торган техниканы махсус оешмадан килеп техник карау да уздыралар.
Шул рәвешле, чананы җәен, арбаны кышын әзерлә, дигән гыйбарә “Авангард” агрофирмасында быел да актуаль булып кала.
Алсу Сәмигуллина, Айрат Насруллов. Татарстан яңалыклары.
