Республикабызда күп кенә программалар гамәлгә ашырыла. Авылларны төзекләндерүдә аерым кешеләр дә актив катнаша. Юкка гына кешене матур эшләре бизи, дип әйтмиләр. Буа районының Иске Суыксу авылы фермеры Алмаз Заһидуллин җирле чишмәне төзекләндереп, аңа яңа сулыш өргән. Үз акчасына кечерәк кенә йорт, баскыч, эскәмияләр ясаткан. Хәйрияченең игелекле эшләре турында алдагы язмада.
Бу урында элеккеге тәртипсезлекнең эзе дә калмаган — яңа өй, уңайлы баскыч һәм эскәмияләр ясалган. Авыл халкы яратып йөргән чишмә санаулы көннәр эчендә күзгә күренеп үзгәргән. Чыганак урнашкан җирләр фермер Алмаз Заһидуллин биләмәсендә булганга, ул яңарту эшләрен үз акчасына башкарган.
Алмаз Заһидуллин фермер “Мин бу чишмәдә уйнап үстем инде. Үземне белә башлаганнан бирле шушында булдым.
Авылның исеме дә әлеге чишмәдән килеп чыккан, дип сөйлиләр. Бәлки, башка чишмәдәндер, ләкин Суыксу атамасы нәкъ менә салкын сулы чишмәдән килү-факт”
Чишмәне яңарту эшләренә Алмаз Заһидуллин 100 мең сумнан күбрәк акча тоткан. Бу башлангычны район башкарма комимететы да хуплаган һәм төзелеш кирәк-яраклары белән ярдәм күрсәткән. Тулаем алганда, төзекләндерү эшләрен 2 атна эчендә башкарып чыкканнар.
Авылда өйләргә су краннан килсә дә, күпләр чишмә суын эчәргә тырыша. Әлеге тәмле суны шәһәргә күчтәнәчкә алып китүчеләр дә бар. Әнә, Казан кунагы Дамирә Зарифуллина да “Бу чишмәгә бик еш йөрибез, аның суы бик тәмле. Хәтта Казанга да алып китәбез” дип сөйли.
Дамирә Зарифуллина авыл кунагы «Суы бик чиста, беркайчан да юшкын утырмый. Тәмле дә. Бу чишмәне төзекләндергәннәре өчен без чиксез рәхмәтле”
Яңарту эшләре бу этапта төгәлләнми әле. Быел Алмаз чишмәгә килү юлына таш җәяргә планлаштыра. Шулай ук, якын киләчәктә биредә алма бакчасы утыртырга да ниятли фермер.
Алсу Сәмигуллина, Айрат Насруллов Татарстан Яңалыклары.
