Буа район хуҗалыкларында да, игеннәрне урып-җыю тулы күәтенә бара. “Дружба” агро фирмасының Толымбай бүлекчәсендә игенчеләр, беренчеләрдән булып көзге бодайны суктыруга керештеләр. Алар алдында беренче көннән үк, 48 гектар җирдән бөртекне түкми-чәчми җыеп алу бурычы куелган. Буа районы кырларыннан хәбәрчебез репортажы.
Штурвал артында – тәҗрибәле комбайнчылар. Марат Алимовның быел 16нчы урагы, механизатор шул дәвер җир эшендә хезмәт куя. Ничә еллар тугры хезмәт иткән комбайнын да кадерләп кенә тора.
Алексей Николаев исә хезмәт юлын 5нче сыйныфта укыганда комбайнчы ярдәмчесе булып башлаган. Еллар үтә белән штурвал артына да утырган. Бүген ул үз эшен төгәл башкаручы мөстәкыйль комбайнчы.
Урып-җыю эшләренә барлыгы 33 данә комбайн җәлеп ителгән. Әлеге кампаниядә агрофирманың төрле бүлекчәсендә берничә бригада хезмәт куя.
Комбайннар артыннан ук саламны пресслап та баралар. Әлеге генә башаклар дулкынланып утырган киңлекләрдә алтынсу төргәкләр генә кала.
Бу җаваплы эшне агрофирмада Анатолий Иванов башкара. Салам төргәкләүне ничә елдан бирле инде аңа ышанып тапшыралар.
Кырдагы ашлык Нурвахит авылындагы ындыр табагына кайтарыла. Бодай көшелләре көннән-көн озыная бара.
Урак белән беррәттән көзге чәчү эшләренә дә әзерлек бара.
Урак игенче өчен иң җаваплы имтихан. Аны быел да “бишле”гә башкарып чыгуларын телибез.
Алсу Сәмигуллина, Айрат Насруллов
