Республика районнарында авыл туризмын үстерүгә игътибар көчәя. Пандемия вакытында чит илләргә ял итәргә баруга чикләүләр кертелү белән, Татарстанның тарихи истәлекле яки экзотик урыннары белән кызыксынучылар арта. Алексеевский районының Биләр авылы һәм аның янәшәсендәге Изгеләр чишмәсе территориясен күпләр кече хаҗ кылу урыны дип атый. Зиннәтуллиннар гаиләсе бирегә килгән кунаклар өчен экзотик хайваннар фермасын булдырган.
Зиннәтуллиннар гаиләсе фермерлык эшен җәен бөртекле культуралар, ә кышын гөмбәләр үстерүдән башлап җибәргән. Энергияле, тырыш белгечләр узган елның җәендә яңа юнәлешкә алынганнар, авыл туризмын үстерүгә тотынганнар.
Тәвә кошлары, тавыклар – экзотик кошлар күңелне иркәли, кәефне күтәрә. Аларны яратып карыйлар. Кешеләргә шатлык өләшү рәхәт.
Бүгенге көндә Зиннәтуллиннар фермасында Кытай тавыклары, Африка, Австралия тәвә кошлары, фазаннар, декоратив сарык һәм башка экзотик хайваннар бар. Тәвә кошларын үрчетү гаиләнең күптәнге хыялы булган. Күрше Самара өлкәсеннән кыргый кошларны алып кайтканчы, фермерлар республиканың тәвә кошлары фермалары тәҗрибәсен өйрәнгәннәр. Малларны, кошларны балалары караша. Май бәйрәмнәрендә туристлар күп килгән.
пандемия башлангач, туристлар чит илләргә йөрүдән туктады. Табигатьтә ял итәргә безгә киләләр. Үз куллары белән тәвә кошын ашаталар, кәҗәләрне тотып карыйлар.
Биләр элеккечә үк туристларны җәлеп итү үзәге, дип саный Айдар Зиннәтуллин. Сәяхәтчеләргә шартлар тудыру, аларны экзотик хайваннар белән таныштыру, шәһәр ыгы-зыгысыннан ял итү мөмкинлеге бирү-бик яхшы эш. Әлегә каурыйлы кошлар табыш китерми, киресенчә, үзләрен тотуга күп акча тотыла.. Шулай да Зиннәтуллиннар агротуризмны үстерүдән баш тартырга җыенмый.
Дмитрий Второв, Татарстан яңалыклары, Алексеевский районы.
