Берничә көн рәттән яуган кар шәһәр юлларын каплап куйды. Торак-коммуналь хуҗалыгы һәм идарәче компания аны җыештыруга барлык көчне куялар. Кар ишүдән туктады, әмма хәзер аның өемнәрен шәһәрдән чыгарып өлгертәсе бар. Кайчак булган ресурслар да җитеп бетми. Коммуналчыларның шәһәрне кардан арындыру буенча эшен хәбәрчебез күзәтте.
Кар җыйгыч машина иртәнге сәгать өчтә эшкә кузгала инде. Бу вакытта әле юлларда комачаулаучы автомашиналар булмый. Бу көннәрдә коммунал хезмәтчелекләр өчен иң кызу вакыт. Кар каты яуган көннәрдә юл кырыйларын гына чистартып тордылар. Хәзер җыелган көртләрне күчкә туплап, карны полигоннарга чыгаралар.
ЖКХ оешмасы директоры урынбасары Айрат Сафиуллин: «Һава торышына бәйле рәвештә көчәйтелгән режимда эшлибез. Урамнарны чистартуга һәм кар чыгаруга барлык техниканы җиктек. Болар — өч КДМ, алты МТЗ, ике РКЦМ һәм грейдер-амкадор. Өстәмә рәвештә үзәк урамнардан карны чыгару өчен ике амкадор һәм сигез КамАЗ җәлеп иттек. Машиналар көнгә 60-70 рейс ясыйлар.»
Көн саен КамАЗлар 1200дән күбрәк метр куб кар чыгаралар. Беренче чиратта автомобиль хәрәкәте тыгыз булган үзәк урамнардан.
ЖКХ оешмасы директоры урынбасары Айрат Сафиуллин: «Эшне бернәрсәгә карамастан туктатмыйбыз. Кар яуганда да. Барлык җәяүле аркылы чыгу урыннарын чистартабыз. Кайдадыр өлегереп тә җитмибездер. Әмма яшәүчеләргә уңайлы шартлар булдыру өчен барлык көчне куябыз»
Идарәче компания хезмәткәрләренә дә җиңел түгел. Алар балансында 130дан күбрәк күпкатлы йорт. Кар тулган ишегалларын 11 ишегалды җыештыручы чистарта. Аларның төп коралы – көрәкләр.
Людмила Долгова: «Кар яуганда эш күп. Без ул туктагач ук җыештырырга тырышабыз. Бик иртәнге сәгатьләрдә тотынабыз. Дүрттә дә, алты да. Бер участокны җыештыру да гаять арыта. Җиңел түгел.»
Ә кайчакта урамда парковкаланган машиналар коммуналчылар эшенә комачаулык тудыра. Мондый проблемалар белән алар барлык ишегалларында диярлек очраша.
Кар белән тулган ишегалларында автомобильләр буенча йортлар буенча башларга хәбәр итәбез. Алар ватсап төркемнәре аша автотранспорт хуҗаларын кисәтәләр. Әгәр инде алар берничә әйтеп тә тыңламасалар, адсинистратив комиссия аша йогынты ясыйбыз.
Гөлия Батырова: «Карны чыгармау, аны туплап яткан өчен ТР административ хокук бозулар турында Кодексының 3,6 маддәсе буенча штраф каралган. Бу муниципаль районны төзекләндерү кагыйдәләрен бозуга керә. Гражданнарга административ штрафлар 2000нән 3500 сумга кадәр, вазифаи затларга 15 мең сумнан 30 мең сумга кадәр, ә юридик затларга 200 мең сумнан 500 мең сумга кадәр тәшкил итә.»
Штраф беренче кисәтүдән салынмаячак. Карны чыгару өчен бер атна вакыт бирелә. Быел буада кар чыгару өчен ике полигон оештырылган – Казан Тракты урамында һәм Бикмураз авылы янында.
Камилә Мусина, Айрат Насруллов. Татарстан хәбәрләре.
