Азнакай районы хуҗалыкларында бар көчне терлек азыгы әзерләүгә туплаганнар. Бу көннәрдә сенаж базлары янында эш кайный. Тулырак Фәнис Мөхәммәтов репортажында.
Бу кадрларны без апрель аенда республикада иң беренчеләрдән булып чәчүгә керешкән “Таллы Бүләк” кооперативы басуларында төшергән идек. Яз, җәй башы үзенчәлекле килде, яңгырлар тигез яумады. Үсемлекләр тиешенчә үсә алмады.
Булган азыкны әрәм-шәрәм итмичә, сыйфатлы азыкны мөмкин кадәр күбрәк әзерләү мөһим. Ә Азнакай төбәгендә терлекләрне күпләп асрыйлар. «Таллы Бүләк» хуҗалыгы базасында узган семинарда белгечләр сыйфатлы азык әзерләү, сенаж салу технологияләренә тукталды. Көннең төп бурычы – күпьеллык үләннәрне беренче кат тиз арада чабып бетереп, кышкы саклауга урнаштыру.
Күпьеллык үләннәрне беренче кат чабуне тәмамлагач, берьеллык үләннәрне чабуга тотыналар. Коры һава шартларында үсемлекләрне яфрактан тукландыру да үткәрелә.
Быел игеннәр бер үк вакытта тигез өлгерер дип фаразлыйлар. Хуҗалыклар урып-җыюга да әзерләнә, комбайннар ремонтын дәвам итәләр. 1 июльгә бу эшне төгәлләү бурычы куелган.
Айдар Шәмсетдинов һәр сәгатьнең кадерле икәненә басым ясап, бар көчне терлек азыгы әзерләүгә юнәлтергә кирәклеген ассызыклады.
